العربية | English






        
لیستى سه‌ره‌كى
Skip Navigation Links
ماڵپه‌ڕ
ده‌رباره‌ى وه‌زاره‌تExpand ده‌رباره‌ى وه‌زاره‌ت
هه‌واڵ و چاڵاكیExpand هه‌واڵ و چاڵاكی
ئامار و توێژینه‌وهExpand ئامار و توێژینه‌وه
سكاڵای کەسوکاری شەھیدان
دادگای باڵای تاوانه‌كان
دۆكيۆمێنت
لێژنه‌ى باڵاى جينۆسايد
كتێبخانه‌
گه‌له‌ری‌Expand گه‌له‌ری‌
به‌سته‌ر
په‌يوه‌ندى
مارشی ئه‌نفال
راپۆرتی‌ چالاكییه‌كان

راپۆرتی كاروچالاكییه‌كانی به‌رێوبه‌رایه‌تی گشتی دهۆك له‌ ماوه‌ی شه‌ش مانگی یه‌كه‌می ساڵی 2012


Anfal minister steps up efforts on international recognition of Kurdish genocide during London-Hague visit


هه‌لی دامه‌زراندن لە وەزارەتی کاروباری شەهیدان و ئەنفالکراوان


شوینی گۆرە بەکۆمەلە هەلدراوەکانی عراق لەسەر نەخشەی زیندوی گۆگل


نەخشەی شالاوەکانی ئەنفال
 
وتاری سه‌رۆكی حكومه‌ت له‌ مه‌راسیمی پێشوازی روفاتی ئه‌نفالكراوانی مه‌هاری




پاش ئه‌وه‌ی ئه‌مڕۆ 28/5 له‌ سلێمانی مه‌راسیمی پێشوازیكردن له‌ روفاتی 730 ئه‌نفالكراوی ناوچه‌ی مه‌هاری ده‌ستیپێكرد، له‌و مه‌راسیمه‌دا نێچیرڤان بارزانی سه‌رۆكی حكومه‌تی هه‌رێمی كوردستان وته‌یه‌كی پێشكه‌شكرد كه‌ ئه‌مه‌ ده‌قه‌كه‌یه‌تی:

به ‌ناوی‌ خودا
كه‌سوكاری‌ شه‌هیدانی‌ ئه‌نفال..
به‌ڕێزان..
حكومه‌تی‌ هه‌رێمی‌ كوردستان به ‌رێزه‌وه‌ پێشوازی‌ له‌ڕوفاتی‌ ئه‌م شه‌هیدانه‌ ده‌كات و وه‌ك ئه‌ركێكی خۆی ئاماده‌ی‌ ڕیۆره‌سمی‌ ناشتنه‌وه‌یان ده‌بێ و سه‌ری رێز له ‌به‌رده‌میاندا داده‌نه‌وێنێ.
به‌ڕێزان، ئه‌م 730 شه‌هیده‌ ته‌نیا له ‌سه‌ر یه‌ك شت ئه‌نفال و شه‌هید كران، ئه‌ویش كوردبوونه‌. كه‌واته‌ ئه‌نفال بۆ له‌ناوبردنی كورد بوو، كه‌وابێ ئه‌نفالچییه‌كان دژی ته‌قسیماته‌كانی خوای گه‌وره‌ش بوون.
تابووتی ئه‌م چه‌ند شه‌هیده‌ی من له ‌به‌رده‌میاندا وه‌ستاوم، سیمبۆلی شه‌هیدانی نه‌ته‌وه‌كه‌مانن. ئه‌مڕۆ به‌ ناوی حكوومه‌تی هه‌رێمی كوردستانه‌وه‌ پێیان ده‌ڵێین: ئازادی و ده‌ستكه‌وته‌كان و پێشكه‌وتنه‌كانی ئێستای كوردستان به‌رهه‌می خوێنی ئێوه‌یه‌. به‌رهه‌می‌ ڕه‌نج و خه‌باتی‌ گه‌لی‌ كوردستان و پێشمه‌رگه‌ قاره‌مانه‌كانیه‌تی‌. سوێند به‌ گیان و خه‌ونه‌كانی ئێوه‌، كه‌ هه‌میشه‌ بۆ ئازادی و ئاوه‌دانی و پێشكه‌وتنی كوردستان تێبكۆشین. سڵاو و ڕه‌حمه‌تی خودا له‌ ئێوه‌ و له‌ گشت شه‌هیدانی كوردستان.
سڵاو له‌و شه‌هیدانه‌ی‌ كه‌ ئه‌و ئازادی‌ و پێشكه‌وتنه‌ی‌ ئه‌مڕۆ ئێمه‌ هه‌مانه‌؛ له‌ سایه‌ی‌ خه‌بات و ماندووبوون و فیداكاریی‌ ئه‌وان بووه‌. یادیان ده‌كه‌ینه‌وه‌ و سڵاو و ڕێز و خۆشه‌ویستییان بۆ ده‌نێرین.
به ‌داخه‌وه‌ حكوومه‌ته‌كانی‌ عیراق، هه‌ر له‌ سه‌ره‌تای دامه‌زراندنی‌ ده‌وڵه‌تی‌ عیراقییه‌وه‌ له‌ ماته‌مینی‌ و ناخۆشی‌ و كاره‌سات به‌ولاوه‌، هیچی‌ دیكه‌یان به‌ گه‌لی‌ كوردستان ڕه‌وا نه‌بینیوه‌.
ئه‌مڕۆ، جارێكی‌ دیكه‌ دڵ و جه‌رگ و به‌شێكی‌ مێژووی‌ مه‌رگه‌ساتی نه‌ته‌وه‌كه‌مان، له‌ خاكی پیرۆزی خۆماندا ده‌نێژینه‌وه‌، كه‌ هیوادارین نه‌وه‌ی ئێستا و نه‌وه‌كانی داهاتوو، چاویان به‌م جۆره‌ مه‌رگه‌ساته‌ نه‌كه‌وێته‌وه‌.
هه‌موومان له‌ ناخی دڵه‌وه‌، هه‌ست به‌ ئازار و خه‌م و په‌ژاره‌ی‌ كه‌سوكاری‌ ئه‌م شه‌هیدانه‌ی ناوچه‌ی قادر كه‌ره‌م و گشت قوربانیانی‌ ئه‌نفال و كیمیاباران ده‌كه‌ین. ئێمه‌ له‌ نه‌ته‌وه‌كه‌مان به‌ گشتی، له‌ بنه‌ماڵه‌كانیشماندا به‌ تایبه‌تی هه‌ریه‌كه‌مان به‌شی خۆمان له‌ ئه‌نفال و وێرانكاری و كۆمه‌ڵكوژیی ڕژێمه‌كانی پێشووی عیراقی بینیوه‌.
ئازارێكی زۆر گه‌وره‌یه‌ كه‌ ته‌رمی‌ پیرۆزی‌ ئه‌م خۆشه‌ویستانه‌ ده‌نێژینه‌وه‌. هه‌شت شاڵاوه‌كه‌ی ئه‌نفال، له‌ 6 ناوچه‌ی كوردستاندا، 182 هه‌زار كه‌سی لێ ون كردین، كه‌ ئێستا ناوه‌ ناوه‌ له‌ بیابانه‌كاندا ده‌یاندۆزینه‌وه‌.
به‌ داخه‌وه‌ حكوومه‌ته‌كانی‌ عیراق، به‌ تایبه‌تی‌ ڕژیمه‌كه‌ی‌ سه‌دام، هه‌ر ئه‌وه‌یان به‌ گه‌له‌كه‌مان ڕه‌وا بینیوه‌، ده‌یانویست هه‌ر ئه‌وه‌ به‌شی كورد بێ، به‌ڵام كورد و هه‌موو گه‌لانی ئازادیخواز ڕۆژانه‌ ده‌یسه‌لمێنن، سه‌رئه‌نجام ڕژێمه‌ دیكتاتۆره‌كان ده‌ڕوخێن و ئیراده‌ی ئازادیخوازی گه‌لان سه‌رده‌كه‌وێ.
هیوادارین بازنه‌ی‌ ئه‌م مه‌ینه‌تیانه‌ بشكێ و نه‌ته‌وه‌كه‌مان به‌ ته‌واوی و یه‌كجاری‌ ڕزگار ببێ و په‌یامی‌ مرۆڤانه‌ و ئازادیخوازانه‌ی‌ گشت شۆڕشه‌كانی‌ كوردستان، بێته ‌دی‌.
ئه‌مڕۆ هه‌لومه‌رجێكی‌ له‌بار بۆ گه‌له‌كه‌مان هه‌ڵكه‌وتووه‌، مه‌رجی‌ سه‌ركه‌وتنمان یه‌كڕیزیی‌ لایه‌نه‌ سیاسییه‌كان كوردستان و گه‌لی‌ كورده‌‌.
بۆ ئه‌وه‌ی مێژووی خۆمان بزانین و به‌ زاناییه‌وه‌ ته‌ماشای ئاینده‌ی خۆمان بكه‌ین، ده‌بێ نه‌وه‌ی‌ ئێستا و ئایینده‌ هه‌میشه‌ یادی‌ ئه‌م شه‌هیدانه‌ له‌ دڵ و فكریاندا زیندوو ڕابگرن.
ده‌بێ نه‌وه‌كانمان هه‌میشه‌ ئه‌وه‌ به‌ بیری‌ خۆیان بهێننه‌وه‌ كه‌ ئه‌م قوربانیانه‌ چ ڕۆژگارێكی‌ ناخۆشیان به‌ سه‌ر بردووه‌، له ‌كاتی‌ ده‌سگیركردنیان له‌ لایه‌ن ڕژێمه‌وه‌، تاوه‌كو گواستنه‌وه‌یان، زیندانیكردنیان له‌ نوگره‌ سه‌لمان و عه‌رعه‌ر و زیندانه‌كانی دیكه‌ی بیابان، ئینجاش زینده‌به‌چاڵكردن و به‌كۆمه‌ڵكوشتنیان. ته‌نانه‌ت شاردنه‌وه‌ی ناونیشانی گۆڕه‌ به‌ كۆمه‌ڵه‌كانیشیان. نه‌وه‌ی‌ ئێستامان و ئاینده‌ ده‌بێ ئه‌م ڕاستییه‌ بزانێت و هه‌میشه‌ له‌ دڵ و ده‌روونیدا، ئه‌وه‌ی‌ كه‌ به‌ سه‌ر گه‌له‌كه‌ماندا هاتووه‌، به‌ زیندوویی‌ بهێڵێته‌وه‌.
دوای‌ ڕووخانی ڕژێم، په‌یتا په‌یتا گۆڕستانه‌ به‌ كۆمه‌ڵه‌كان ده‌دۆزرێنه‌وه‌. كه‌ ئه‌و گۆڕستانانه‌ به‌ڵگه‌ و شایه‌دیی‌ ئه‌به‌دیی‌ تاوانه‌كانی عه‌قلیه‌تی تاوانكاری و شۆڤێنین ده‌رهه‌ق به‌ نه‌ژادی‌ كورد. به‌ڵام وانه‌كانی ئه‌و تاوانانه‌ پێمان ده‌ڵێن، نابێ ده‌ستبه‌رداری هیچ مافێكی میلله‌ته‌كه‌مان بین.
ده‌بێ به‌ هه‌موو لایه‌كمانه‌وه‌ هه‌وڵ بده‌ین تاوانی‌ ئه‌نفال له‌ جیهاندا بناسێنین، له ‌ڕووی یاساییشه‌وه‌ له‌ سه‌ر ئاستی جیهان به‌ جینۆساید بیناسێنین. له‌و بواره‌دا حكوومه‌تی هه‌رێمی كوردستان جه‌خت له ‌سه‌ر ئه‌وه‌ ده‌كاته‌وه‌ كه‌ وه‌ك ئه‌ركێكی خۆی به‌ گرنگییه‌وه‌ له‌و كاره‌ ده‌ڕوانێ، بۆیه‌ش زۆر پێداگیری له ‌سه‌ر گرنگیی پرۆسه‌ی ناساندنه‌وه‌ی قوربانییه‌كان و مامه‌ڵه‌كردنی زانستیانه‌ له‌گه‌ڵ گۆڕه‌ به‌ كۆمه‌ڵه‌كان ده‌كه‌ین.
هه‌ر لێره‌دا پێداگیری له‌ سه‌ر ئه‌وه‌ ده‌كه‌ین، كه‌ ده‌بێ حكوومه‌تی عیراق ئه‌ركی خۆی به ‌جێ بگه‌یه‌نی له‌ جێبه‌جێكردنی بڕیاره‌كانی دادگای باڵای تاوانه‌كان و ئه‌نجوومه‌نی نوێنه‌رانی عیراق له‌باره‌ی قه‌ره‌بووكردنه‌وه‌ی كه‌سوكاری قوربانیانی ئه‌نفال و جینۆساید و كیمیاباران له‌ هه‌رێمی‌ كوردستان.
ماته‌مگێڕانی به‌ڕێز ..
ئه‌وانه‌ی‌ تا ئێستا له ‌سه‌ر شاڵاوه‌كانی ئه‌نفال به‌ سزا گه‌یشتوون، نموونه‌یه‌كی‌ تاوانبارانن. به‌ڵام تاوانباری‌ ئه‌ساسی‌ كه‌ هێشتا ماوه‌، عه‌قڵیه‌تی‌ فاشستی‌ و كۆمه‌ڵكوژییه‌، عه‌قڵیه‌تی‌ دوژمنایه‌تیكردنی‌ گه‌لی‌ كوردستان و مافه‌ ڕه‌واكانیه‌تی‌، عه‌قڵیه‌تی‌ پاراستنی‌ میراتی‌ سیاسه‌تی‌ ته‌عریب و پاكتاوی‌ نه‌ژادییه‌. ئه‌و عه‌قڵیه‌ته‌ كه‌ ناوه‌ به‌ ناوه‌ سه‌رهه‌ڵده‌داته‌وه‌، مه‌ترسییه‌كی‌ سه‌ره‌كییه‌ له ‌سه‌ر ئێستا و له‌ داهاتووی‌ عیراقدا.
گرنگ نییه‌ ئه‌م حوكمڕانه‌ له‌ ئه‌وی‌ دیكه‌ ده‌سه‌ڵاتی‌ كه‌متره‌، یان چه‌كی‌ كه‌متری‌ هه‌یه‌. به‌ڵام گرنگ ئه‌و عه‌قڵیه‌ته‌یه‌ كه‌ حوكم به‌ڕێوه‌ ده‌بات. چونكه‌ تاوان هه‌ر تاوانه‌. كه‌واته‌، تا ئه‌و ڕۆژه‌ی‌ كه‌سانێك په‌یدا ببن مافی‌ كورد و خه‌ڵكی‌ دیكه‌ ئینكار بكه‌ن و شوێنه‌واری‌ ڕژێمی‌ پێشوو بپارێزن، ئه‌وا دوور نه‌بینن كه‌ سیاسه‌تی‌ كۆمه‌ڵكوژی‌ و ئه‌نفال تازه‌ ببێته‌وه‌.
هه‌ندێ لایه‌نی‌ سیاسی‌ ئه‌مڕۆ له‌ عیراقدا، به‌ هه‌موو توانایه‌كیانه‌وه‌ هه‌وڵ ده‌ده‌ن شوێنه‌واری‌ ته‌عریب و ئه‌نفال و كۆمه‌ڵكوژی‌ نه‌سڕێته‌وه‌، به‌ڵكوو ده‌یانه‌وێ وه‌ك خۆی‌ بمێنێته‌وه‌. ئه‌ویش له‌وه‌دا دیاره‌ كه‌ ناهێڵن و نایانه‌وێ ماده‌ی‌ 140 جێبه‌جێ بكرێ. واته‌ ناهێڵن ده‌ست له‌ میراتی‌ ڕه‌شی‌ ئه‌نفال و كۆمه‌ڵكوژی‌ بدرێت. به‌ مانایه‌كی‌ دیكه‌، به ‌داخه‌وه‌ تا ئێستا پشتگیریی‌ ئه‌و سیاسه‌ته‌ نه‌فره‌تییه‌ ده‌كه‌ن كه‌ پێشتر هه‌بووه‌.
ئێمه‌ ده‌پرسین: ئه‌نفال بۆچی‌ كرا؟ ئایا هه‌ر بۆ ئه‌وه‌ نه‌بوو شوێنه‌واری‌ ته‌عریب بپارێزن و كه‌ركووك و ناوچه‌كانی‌ دیكه‌ هه‌تا هه‌تایه‌ له‌و مه‌ینه‌تییه‌دا بمێننه‌وه ‌و له‌ كورد و جوگرافیای كوردی داببڕن؟ به‌داخه‌وه‌، ئه‌وه‌ تا ئێستا به‌رده‌وامه‌ و كێشه‌ی ئه‌و ناوچانه‌ چاره‌سه‌ر نه‌بووه‌. كه‌واته‌ ده‌توانین بڵێین هه‌تا ئێستا كێشه‌ی كورد له‌ عیراق چاره‌سه‌ر نه‌بووه‌. ئه‌وه ‌بوو ئامانجی‌ ئه‌سڵیی‌ ئه‌نفال، چۆڵكردنی‌ شار و دێهاته‌كانی‌ كوردستان و نیشته‌جێكردنی‌ خه‌ڵكی‌ دیكه‌ له‌ شوێنیان.
ئه‌وه‌ی‌ ئه‌مڕۆ له‌ سه‌عدییه‌ و جه‌له‌ولا و كه‌ركووك و هه‌ندێ جێگه‌ی‌ دیكه‌ ڕوو ده‌دات، درێژه‌دانه‌ به‌ هه‌مان سیاسه‌ت، هه‌رچه‌نده‌ ڕه‌نگ و شێوه‌ی‌ سیاسه‌ته‌كه‌ گۆڕاوه‌، به‌ڵام جه‌وهه‌ره‌كه‌ی‌ هه‌ر یه‌كه‌.
كه‌واته‌ ده‌بێ زۆر هۆشیار بین بۆ ئه‌وه‌ی كۆمه‌ڵكوژی‌ و ئه‌نفال به‌ شێوه‌ی‌ دیكه‌ له‌ كوردستاندا دووباره‌ نه‌بنه‌وه‌. ده‌بێ بزانین كه‌ جیا له‌ تانك و زریپۆش و فڕۆكه‌ی‌ جه‌نگی‌ و هێرشی‌ زه‌مینی‌، سیاسه‌ت و چه‌كی‌ تریش هه‌یه‌ بۆ ئه‌نفالكردن. ئه‌و مه‌ترسییه‌ نه‌ك ته‌نیا له ‌سه‌ر گه‌لی‌ كوردستانه‌، به‌ڵكوو پێكهاته‌كانی‌ دیكه‌ی‌ عیراقیش له‌ ئاینده‌دا ده‌كه‌ونه‌ به‌ر هه‌ڕه‌شه‌، ئه‌گه‌ر عه‌قڵیه‌تی كۆنی تاوانكاریكردن وه‌لا نه‌نرێت.
ئێمه‌ كه‌ ده‌ڵێین ده‌بێ ده‌ستوور جێبه‌جێ بكرێت، بۆ ئه‌وه‌مانه‌ گه‌لی كوردستان و هه‌موو گه‌لی عیراق تووشی مه‌ینه‌تی و ئازار نه‌بێته‌وه‌. هه‌ر بۆیه‌ش ئێمه‌ وه‌ك حكوومه‌ت و گه‌لی‌ كوردستان هه‌وڵ ده‌ده‌ین سنوورێكی‌ ده‌ستووری‌ و یاسایی‌ به‌هێز دابنرێ تاوه‌كو جارێكی‌ دیكه‌ دیكتاتۆری و تاكڕه‌وی‌ و عه‌قڵیه‌تی‌ فاشیستانه‌ی‌ ده‌سه‌ڵات، جارێكی‌ تر بۆ ئه‌م وڵاته‌ نه‌گه‌ڕێته‌وه‌.
سیاسه‌تی‌ سه‌رۆكایه‌تیی‌ هه‌رێمی كوردستان و حكوومه‌تی كوردستان و گشت پارت و ڕێكخراوه‌ كوردستانی‌ و دیموكراتییه‌كانی‌ عیراق زۆر ڕوون و ئاشكرایه‌. كه‌ هه‌ر ئه‌وه‌مان ده‌وێ ده‌ستوور به ‌ڕاستی‌ حاكم بێ و ڕێزی‌ لێ بگیرێت و زه‌مانه‌تی‌ وه‌ها دابنرێن كه‌ ڕێگه‌ نه‌درێ هیچ كه‌س و هیچ حیزب و لایه‌ن و تاقمێك؛ سیسته‌می‌ دیموكراتی‌ و فیدرالی پێشێل بكات.
ده‌مانه‌وێ سیسته‌می‌ دیموكراتیی‌ عیراق، به‌ دروستی‌، له ‌سه‌ر عه‌داله‌ت و ته‌وافوق و ڕێزگرتن له‌ گشت پێكهاته‌كان دابمه‌زرێت.
مێژوو به ‌گشتی و مێژووی عیراقیش به ‌تایبه‌تی پێمان ده‌ڵێ، زوڵمكردن له‌ به‌شێكی گه‌لی عیراق؛ سه‌رئه‌نجام هه‌موو پێكهاته‌كانی گه‌لی عیراق ده‌گرێته‌وه‌. كه‌واته‌، خه‌ڵكی‌ كوردستان و عیراق به‌ دیموكراتخواز و مافپه‌روه‌ره‌كانییه‌وه‌، ده‌بێ یه‌ك بگرن له‌ پێناو:
1- ڕێگرتن له‌ هه‌ر عه‌قڵیه‌تێكی‌ دیكتاتوری‌ و تاكڕه‌وی‌.
2- ڕێزنان له‌ گیانی‌ ته‌وافوق كه‌ بناغه‌ی‌ ده‌ستووری عیراقه‌.
3- چه‌سپاندنی‌ فیدرالی و به‌دیهێنانی‌ داوای ئه‌و پارێزگایانه‌ی كه‌ فیدرالیان ده‌وێ.
4- پاراستنی‌ گشت مافه‌ ده‌ستوورییه‌كانی‌ هه‌رێمی‌ كوردستان و جێبه‌جێكردنی‌ ماده‌ی‌ 140 له ‌سه‌ر ئه‌ساسی‌ سڕینه‌وه‌ی‌ گشت شۆینه‌واره‌كانی‌ سیاسه‌تی‌ ته‌عریب و ئه‌نفال و كیمیاباران.
5- هه‌وڵدان بۆ ناساندنی‌ ئه‌نفال به‌ جینۆساید ده‌رهه‌ق به‌ كورد له‌ گشت جیهاندا.
6- تاوانه‌كانی‌ ئه‌نفال و كیمیاباران بخرێنه‌ ناو وانه‌كانی پرۆگرامه‌كانی خوێندن له‌ گشت قوتابخانه‌كانی‌ عیراقدا.
7- قه‌ره‌بووكردنه‌وه‌ی‌ زیانه‌كانی‌ گه‌لی‌ كورد و قوربانیانی‌ ئه‌نفال و كیمیاباران له‌ هه‌موو ڕوویه‌كه‌وه‌.
8- بایه‌خی‌ جددی‌ به‌ چاره‌سه‌ریی‌ كێشه‌ كۆمه‌ڵایه‌تییه‌كانی‌ خه‌ڵكی‌ عیراق له‌ هه‌موو ڕوویه‌كه‌وه‌، له‌ مه‌سه‌له‌ی‌ نیشته‌جێبوون و كاره‌با و ئاوی‌ پاكی‌ خواردنه‌وه‌ و ڕێگه‌ و شته‌كانی‌ تر.
ده‌مانه‌وێ خه‌ڵكی‌ عیراق، به‌ هه‌رێمی كوردستانیشه‌وه‌، به‌ ئاسووده‌یی‌ و ئارامی‌ بژی و هه‌لومه‌رجی‌ ژیانێكی‌ دیموكراسیانه‌ی كامه‌ران و مرۆڤانه‌ی شایسته‌یان بۆ دابین بكرێت. بۆ ئه‌وه‌ی ئه‌نفال و دیكتاتۆری نه‌بینینه‌وه ‌و مه‌رگی هه‌زاران ئازیزی به‌ ناحه‌ق شه‌هیدكراوی وه‌ك ئه‌م ئازیزانه كه‌ ئه‌مڕۆ ئێمه‌ له‌به‌ر ده‌میاندا ڕاوه‌ستاوین؛‌ نه‌بینینه‌وه‌.
ئێمه‌ بۆ ئه‌وه‌ تێده‌كۆشین، تێكۆشانی‌ ئێمه‌ له‌پێناو عیراقێكی‌ سه‌قامگیره‌، له‌پێناو ژیانێكی‌ به‌خته‌وه‌ره‌ بۆ گه‌لی‌ كوردستان و هه‌موو گه‌لانی‌ عیراق.


زۆر سوپاس.


*له‌ ماڵپه‌ری PUK MEDIA وه‌رگیراوه‌.

ئه‌رشيفى ماڵپه‌ڕى كۆنى وه‌زاره‌ت